نهار 19 الفايت كان سابقة فتاريخ الويب، لحقاش خرج الاصدار الجديد ديال متصفح Brave و معاه جا بروتوكول جديد اول مرة غادي يتدمج فمتصفح : ipfs
الipfs هو اختصار ديال Interplanetary File System، جا باش يدير بلاصتو مع الغني عن التعريف Http.
اول مرة بان كان عام 2015 و من داك الوقت و هو كيتم التطوير ديالو و استعمالو فمشاريع متعددة لكن الخطوة ديال هاد المرّة شيء اللي ممكن يغيّر الويب كيف ما كنعرفوه حاليا.
الipfs هو بروتوكول لا مركزي، فحال الbittorrent فالملفات او البيتكوين فالعملات، خلافا للHTTP اللي كيتصل بسيرفور مركزي باش يجيب منو المعلومات، يعني ان المحترى او الموقع يقدر يكون عند واحد او بزاف بشكل مشترك، بعد ما كتدير ipfs:// فالمتصفح و العنوان، الشبكة كتلقى شكون اللي عندو او عندهم داك المحتوى و يبان ليك فالمتصفح، و هذا يعني انك ممكن تكون client و server فنفس الوقت.
هادشي كيعني ان مع هاد البروتوكول ممكن الاستغناء عن الhosting، و المحتويات غتبان بشكل اسرع لحقاش الشبكة كتختار الnodes الأقرب ليك و غيكون شبه مستحيل يطيح موقع معيّن سواء بسباب خلل او هجوم لحقاش بزاف ديال الناس مشاركين فيه عكس السيرفورات المركزية.
الipfs تم استعماله مثلا سنة 2017 ردا على قرار حجب ويكيبيديا من طرف الحكومة التركية https://go.mounir.blog/wikibantr
او شركة Cloudflare اللي كتطور مشروع بالipfs ، و يقال ان حتى تويتر حاطينو كخيار باش يولي لامركزي، لحقاش البروتوكول صعيب جدا انه يتم الحجب ديالو من طرف الحكومات.
انا شخصيا فكّرت فيكم اصدقائي الفقراء فشي منصة فحال egybest اللي تتفرّجو فيها بدون منع و ما يترفعوش ضدها قضايا ديال حقوق الملكية لحقاش ببساطة ما غتكونش محطوطة فموقع واحد انما كلشي مشارك فيها، و هاد الفكرة عاجلا ام آجلا غادي يديرها شي حد.
التخربيقولوجيا بالدارجة 