مدخل في الOSINT

هو اختصار ل Open Source Intelligence و اللي هي جمع المعلومات عن طريق المصادر المفتوحة للعموم سواء من الويب او وسائل الإعلام المرئية و المكتوبة الخ..
هاد الطريقة اذا تستخدمات بالشكل الصحيح، عندها قوة هائلة في كشف هويات أشخاص و تتبع تحركاتهم او الكشف عن تورطهم في قضايا معينة.
الOSINT كيخدمو بيها حكومات و وكالات استخبارات و شركات كبرى و حتى اشخاص فحالنا لأغراض متعددة لكن فهاد البوسط غادي نوقف على الويب لحقاش هو المجال اللي كيهمني.
عن طريق الOSINT ممكن الكشف عن مروجيّ الأخبار الزائفة على الأنترنت مثلا، تتبع كلمة مفتاح او هاشتاغ حتى تعرف شكون اول واحد قالها في منصة معيّنة، او جمع المعلومات عن متورط في عمليات اختراق فقط من معلومة بسيطة كإسم مستخدم او بريد الكتروني او حتى كلمة مرور.
مثلا عن طريق الOSINT ممكن توصل لأول واحد قام بالترويج لحملة المقاطعة و اللي أغلب الناس ما عارفينش كيفاش بدات ، بينما اي حاجة فالويب عندها نقطة بداية حتى حاجة ما كتجي من العبث.
و ممكن نأكد على انه كاين حاليا فالويب المغربي مجموعة او جوج متخصصين فنشر اخبار زائفة لضرب خصوم سياسيين و كتستغل تقنيات و منصات متعددة و خدامين بشكل احترافي، يعني عمل بدوام كامل من اجل هادشي فقط.
انها الحرب! و اللي ما عندوش جيش الكتروني هزّو الما حرفيا!