علاش خاصك تستعمل Password Manager؟

السيمانة الفايتة تحطيت قدام حالة ديال شركة طلبو مني انني نجرّب واش نقدر ندخل للأنظمة ديالهم…

بعد ما ضربت دويرة على الموقع، و Extranet ديالهم، جمعت معلومات على المسؤول الرئيسي على الأنظمة، انطلاقا من اسم المستعمل ديالو فتويتر، لقيت انه فعلا كيستعمل نفس Login فالنظام ديال الشركة.

شعلت گارو و بقيت كنتأمل فالمعلومات اللي جمعت، ناقصاني شي لعبة و ما عارفش شنو هي، ما بغيتش نخدّم شي Scanner كيف ما كان نوعه باش ما نخليش الأثر بزاف.

و Bingo! ارا نمشي نقلّب على خونا فقواعد البيانات المسروقة!

قواعد البيانات المسروقة او المخترقة هي ديال شركات كبرى تعرّضات للإختراق، فحال Dropbox او Zynga او Taringa الخ…

كاين مواقع متخصصة فجمع هاد قواعد البيانات و ترتيبها و كتعطي امكانية البحث فيها بمقابل مادّي، او تجمعها لراسك و هي عملية كتكلّف وقت و جهد حتى مساحة تخزين لهذا من الأحسن تخلّص و تهنّي راسك.

استعملت https://weleakinfo.com لحقاش جامع عدد لابأس به من قواعد البيانات، ثمن مزيان و الدفع بالبيتكوين.

و فعلا، لقيت صاحبنا مسجل فالعديد من المواقع اللي تم اختراقها فالسنوات الأخيرة، و المصيبة انه مستعمل نفس الباسوورد فكلشي! كلشي!!!!!!!

و كيف ما توقعتو، مستعمل نفس الباسوورد ايضا فأنظمة الشركة، اللي دخلت ليها بدون اية “مقاومة” 😃😃.

لهذا و كيف ما كتبت فالعنوان، استعملو Password Manager و حيدو عليكم هاد العادة القاتلة اللي ممكن تأدي لنتائج وخيمة.

*ممكن تقلّبو على معلوماتكم فهاد الموقع اللي ذكرت بلا ما تخلّصو، كيعطيك الموقع منين تسرقو لكن لا بغيتي تشوفها خاصك تخلّص.

و كننصح بواحد آخر شامل لكن ما كيعطيش التفاصيل :

https://haveibeenpwned.com