هاد العشية مكونيكطي فالروتور ديال واحد الصديق و بعض المواقع كانت كتدير redirection بشكل غير طبيعي، دخلني الشك علما انه فراسي واقعة هجمة كبيرة على الأجهزة اللي مزالة كتستعمل كلمات مرور par defaut, فحال هاد الحالة كان روتور ديال هواوي من عند اتصالات المغرب كيجي فيه telecomadmin:admintelecom
دخلت نشوف كنلقى فعلا لاعبين فالDNS و هدا خطر كبير.
اللي ما عارف شنا هو DNS, بإختصار : منين كتكتب facebook.com راه كاين واحد الخدمة اللي كتترجم داك الموقع الى عنوان IP, داك الخدمة هي الDNS و كيكون موثوق بيها لحقاش كتجاوب العناوين الصحيحة لكل موقع، و اذا ما عندهاش كتسول الخدمة اللي فوق منها و هي غادية…
اذا شدينا و درنا خدمة dns ديالنا و قلنا للروتور بقى تسول هنا، نقدرو نديوك لصفحة اخرى بنفس اسم facebook.com و تدخل معلوماتك و ندوليك معلومات دخولك و نتا متأكد انك كاتب العنوان الصحيح.
نصيحة مني، ايلا غتتكونيكطاو فشي ويفي، استعملو برامج VPN راها موجودة، لحقاش منين كتكون مطونيكطي من 3g/4g صعيب على هاد النوع ديال الهجمات انهم يبدلو ليك dns.
الهجمة مفصلة كيف ما دارت فمواقع الأمن الإلكتروني فالعنوان لتحت.
https://krebsonsecurity.com/2019/02/a-deep-dive-on-the-recent-widespread-dns-hijacking-attacks/
التخربيقولوجيا بالدارجة 